越南河內-還劍湖附近美食推介

已經第二次到河內了⋯⋯ 第一次有越南朋友仔帶路，所以我都無Search過任何資料就飛過去了。今次為了參加越南朋友仔的婚禮，所以我再次飛到越南河內黎個快閃。今次3日2夜之旅，所有大部份都係當地的朋友仔推介，有D係網上都無咩資料架⋯⋯ 如果大家準備去河內去旅行，睇完咁多資料，一定唔會唔識還劍湖！呢個湖位於河內的市中心，仲要好多景點都係附近，所以成為旅客Must Go的地方。今次由於時間緊迫，所以我酒店都係個湖附近，方便用最最少的時間食最多的野(笑)！ > 推介01 • 蛋咖啡 今次一到埗，我先。去了飲蛋咖啡⋯⋯呢間Cafe係上次越南朋友仔帶我黎，網上中文的資料亦唔算多。佢位於兩間店的裏面，所以大家要抬起頭望下個招牌先會揾到個入口。 沿着燈籠一直行，就會入到一個好中國式的Cafe。 大家只要係Couter落完你的Order就可以上樓上坐低 (先不用趕住比錢，只要走的時候拎埋張單到同一個Couter比錢就ok) 沿着樓梯一直上，就會見到天台，係度吹住涼風飲咖啡，係一大樂事！ 如果有位的話，可以選擇坐係近出面的位置，吹住風好好享受。 等左一陣，職員就拎住蛋咖啡上黎⋯⋯ 蛋咖啡有凍有熱。熱的40,000₫(即~HK$13.3) 凍的45,000₫(即~HK$15)。味道比一般用奶沖的咖啡更甜，不過應該係蛋的關係，口感較厚滑。絶對值得加入行程內。 如果大家口痕痕，仲可以加份炸的越南春卷，唔算太油膩，味道不錯。如果無記錯，好似係45,000₫(即~HK$15)。 除了咖啡，Cafe仲有多款果汁、奶昔、果茶，就算唔飲咖啡的大家都可以一齊黎哦～ Café Phố Cổ (Old Town Garden Café) 地址：11 Hàng Gai, Hàng Trống, Hoàn Kiếm, Hà Nội 100000, Vietnam Google Map：https://goo.gl/maps/AAHt2b7xx9P2 > 推介02 • 椰子咖啡沙冰 今次的推介係間連鎖咖啡店，係還劍湖附近都有幾間分店⋯⋯ 大家只要落單及付款後，就可以係上層揾位坐下。呢間分店的Cafe主要係坐低矮櫈仔，著短裙的大家就要小心啦。 Coconut Milk with Coffee椰子咖啡沙冰45,000₫(即~HK$15) 咖啡沙冰都幾香，加埋一座椰子冰的淡淡的椰子香，味道都唔錯。但如果鍾意咖啡的朋友們，可以食飲咖啡底的椰子沙冰哦。但個人就唔係好建議試Coconut Milk with Chocolate，朱古力味係濃的，不過味道有少少過甜了。 Cộng Cà Phê 地址：116 Cầu Gỗ, Hàng Đào, Hoàn Kiếm, Hà Nội, Vietnam Google Map：https://goo.gl/maps/aDibdjMfqgQ2 > 推介03 • 平嘆法式料理 越南曾被法國統治，除了建築上會有D法國的影子外，市面上都會有大量的法式餐廳。呢間餐廳係網上揾到的，除了好多人推介外，CP值都幾高，平均~HK$250多就可以嘆到法國菜啦！ 由於我們係門口拎左張宣傳單張，所以叫野食就可以送杯指定Cocktail。雖然味道偏甜，不店酒的味道仍然係有的。 餐廳好甜心送左每人一碟三款的前菜⋯⋯ 如果我知佢送就唔另外叫一碟啦~ (◐‿◑) 左邊係唔知點左咩的蕉、中間食落似茄汁薯蓉、右邊唔知咩的Puff。 無點湯的我們，餐廳照比左面包我們食。不過無比牛油、又無比橄欖油黑醋，食落有D Dry⋯ 我都係等主菜算。 兩個人的我們，叫左一碟前菜Forest Mushroom Ball 198,000₫(即~HK$66)。用了D西蘭花蓉Mix埋菇粒，食落幾特別，但唔算好好食，OK啦⋯⋯ 期待已久的主菜到了！呢個係男朋友叫的Australian Steak 558,000₫(即~HK$186)，呢個係值得叫的牛排，牛味都幾香，而且Medium煮得岩岩好，肉質又Keep到幾嫩滑。牛排上仲有個Waffle盒，上面放左D香濃的磨菇汁，點牛排都好夾。另外佢自動會包薯菜，由不同蔬果整成的焗薯蓉造型可愛，加埋微酸的蔬菜粒，睇得又食得。 我自己就叫左一份鴨胸Duck Breastin Red Fruit 518,000₫(即~HK$173)。其實我好少食鴨胸，所以唔多識比較，不過肉質都幾實，食落有D似牛排，配埋酸酸地的Plum Sause，都幾開胃。 飲完杯送的Cocktail，又想坐多陣，所以我們就另外再叫多左兩杯Cocktail⋯ 一杯Dry Martini及一杯Mojito，兩杯都係160,000₫(即~HK$53)，但酒精都比一般係香港的餐廳強，大家要量力而為哦。 Green Tangerine Hanoi 地址：48 Hàng Bè, Hàng Bạc, Hoàn Kiếm, Hà Nội, Vietnam Google Map：https://goo.gl/maps/BYmvT6atiH62 > 推介04 • 人氣越式餐廳 由於逗留的時間太短，但又想一次過食多款越南的美食？咁你可以考慮下呢間越式餐廳。呢間餐廳都係由當地朋友介紹，地點同上面介紹的地方係還劍湖的另一邊。餐廳都算幾大，職員大部分都識講英文，而且有正常的枱櫈，難怪咁多歐美的旅客黎呢到食飯。 餐廳提供的食物種類都好廣，由越式沙律、蒸粉卷、炸春卷、蝦餅、咖哩都有。我們叫了一份蒸粉卷 Banh Cuon Nhan Thit 58,000₫(即~HK$19)，卷住豬肉及菇的粉皮幾薄又幾滑，夾埋芫荽再點酸汁，都幾開胃。 為了要點飽肚感，我們叫左一份燒雞配糯米飯Ga Nuong Mat Ong & Xoi Trang 160,000₫(即~HK$53)。可能越南比較多走走雞，燒雞的肉都比較有口感，燒得唔算太香，不過個蜜糖汁又幾香。 由於太耐無食東風螺的關係，所以我叫左一份東風螺食。不過呢碟135,000₫(即~HK$45)，每粒螺都好細粒，細粒到用竹簽吉出黎都有D難道，唔多推介大家試。 本身想要一份木瓜沙律，不過由於售罄的關係，我就轉左叫一份鱸魚，如果無記錯好似係150,000₫(即~HK$50)。鱸魚的肉好滑溜又唔腥，而且香茅味剛剛好，係男朋友全個Trip的Best Pick！ 去到越南，點都要試試正宗越南咖啡！咖啡會經上面鐵的濾杯濾完就會滴落白色的瓦杯內。大家飲的時間記住攪均，因為下面會有煉奶架。但飲完我都係覺得太甜了，不過都值得一試的。 Nhà Hàng Ngon 地址：26 Trần Hưng Đạo, Phan Chu Trinh, Hoàn Kiếm, Hà Nội Google Map：https://goo.gl/maps/gT13yUpJAJn > 推介05 • 當地人都排隊食的鵝肉米粉 係越南一定要食佢地的粉麵！除左D粉面夠滑外，D湯仲好鮮甜。呢間連當地人都會排隊食的小店都係係還劍湖附近。呢間小店係網上唔係好揾到資料，我都係問返越南朋友先知佢確實地址。 係門口手勢2碗，佢就會叫你入去坐底⋯ 等一陣職員就會拎麵比你。其實佢應該有分普通鵝肉、鵝脾等，但唔識越南話的我，最終只有Basic的版本。鵝肉唔算太肥，而且個份量都幾多，40,000₫(即~HK$13)一碗絶對係超值！ 麵入面仲有D用雲耳Mix豬碎的東東，呢個幾香又好食！ 由於室內的位置應該係屬於另一間店，如果大家要坐室內就要另外比錢買野飲。係價錢的Menu下，我們要左一杯青檸茶及龍眼冰共40,000₫(即~HK$13)。此外，飲品店仲有賣油炸鬼，大家都可以加10,000₫(即~HK$3)要一份，當地人會用黎吸麵湯的精華架。 Bún ngan Nhàn 地址：11 Ngõ Trung Yên, Hàng Bạc, Hoàn Kiếm, Hà Nội, Vietnam Google Map：https://goo.gl/maps/HLPMimmQMf72 > 推介06 • 越式地道牛河 最後一個介紹的係係越南必食的牛肉河，其實我都係因為太早到鵝肉米粉，見到佢未開⋯⋯ 由於太餓的關係，就係同一條街見到好多本地人食的牛河，所以直覺要坐下。 份量無鵝肉米粉咁大，不過個湯勁甜！ 河粉比香港個D更薄更滑，到越南不可不試。 牛肉都係唔會太肥，而且唔係用雪藏的牛肉 Phở Sướng 地址：24B Đinh Liệt, Hàng Bạc, Hoàn Kiếm, Hà Nội, Vietnam Google Map：https://goo.gl/maps/SAyH61iHE2k 愈來愈多人去越南玩，希望呢篇文幫到準備緊行程的大家。另外温馨一提，越南好多餐廳及小店都會用超矮的櫈仔比食客坐，大家可盡可能都唔好著短裙仔去啦，好唔方便架～ #旅遊 #越南 #河內 (此文章由U Blog 同步發佈至社群)